Околу 70 отсто од анкетираните гласачи во САД сметаат дека администрацијата на американскиот претседател Доналд Трамп нема јасна стратегија за завршување на војната со Иран, покажува ново национално истражување на „Фокс њуз“, спроведено речиси седум месеци по почетокот на конфликтот.
Според анкетата, ставот дека администрацијата на Трамп нема јасен план го делат 95 отсто од демократите, 83 отсто од независните гласачи и 43 отсто од републиканците. Истовремено, 47 отсто од испитаниците сметаат дека конфликтот на долг рок ќе ги направи Соединетите Американски Држави помалку безбедни. За споредба, 32 отсто очекуваат земјата да биде побезбедна, додека 20 отсто не очекуваат значителна промена.
Уделот на Американците кои стравуваат дека конфликтот ќе ја намали безбедноста на САД е зголемен во однос на април, кога таков став имале 39 отсто од испитаниците. Најголем пораст на загриженоста е забележан меѓу белите гласачи, гласачите помлади од 45 години и независните гласачи.
Повеќето ја оценуваат интервенцијата како погрешна
Според истражувањето, 60 отсто од испитаниците сметаат дека одлуката на САД воено да интервенираат против Иран била погрешна, додека 37 отсто ја оценуваат како исправна. Разликата е зголемена во споредба со јуни, кога односот бил 58 отсто наспроти 41 отсто.
Републиканскиот анкетар Дарон Шо, кој истражувањето го спроведува заедно со демократскиот анкетар Крис Андерсон, оценил дека американската јавност во овој случај не се обединила околу претседателот на вообичаениот начин за време на надворешнополитичка криза.
Како можни причини тој ги посочил начинот на кој Трамп ја образложува војната и фактот дека американските копнени сили не се директно ангажирани.
Пад на поддршката за Трамп во надворешната политика
Работата на Трамп ја одобруваат 39 отсто од испитаниците, додека 61 отсто не ја одобруваат. Кога станува збор за неговата надворешна политика, поддршката изнесува 37 отсто, што според анкетата е негов најнизок резултат во вториот претседателски мандат. Сепак, Иран не е меѓу главните проблеми што Американците ги издвојуваат како најважни за земјата.
Само 4 отсто од испитаниците го навеле Иран како најважен проблем со кој се соочуваат САД, додека 1 отсто ја навело надворешната политика воопшто. Најчестиот одговор биле трошоците за живот – нив ги посочиле 34 отсто од анкетираните гласачи.
