Министерството за внатрешни работи информира дека по финалното тестирање, ставени се во функција безбедносните камери од системот за сообраќаен надзор „Безбеден град“ на патот кон Охрид.

Од МВР најавуваат дека наскоро камерите ќе бидат активирани и на сообраќајниците во Охрид и регионот, каде уредите веќе се поставени, а во тек се завршните технички проверки и тестирања.

Системот се проширува и во Охрид

Камерите се дел од системот за сообраќаен надзор „Безбеден град“, кој има цел да придонесе за поголема безбедност во сообраќајот и почитување на правилата на патиштата.

Според МВР, по завршувањето на проверките, системот ќе биде пуштен во функција и на повеќе локации во Охридскиот регион.

Апел до возачите

Од полицијата апелираат до сите возачи доследно да ги почитуваат сообраќајните правила и прописи.

„Апелираме до сите возачи доследно да ги почитуваат сообраќајните правила и прописи и сите да придонесеме за побезбедни патишта низ државата“, велат од МВР.