Новиот механизам за наплата на сообраќајните казни од странски возила започна на 19 август, но на Табановце предизвика долги задржувања и колони.

Од 19 август, возилата со странски регистарски таблички кај кои „Безбеден град“ регистрирал сообраќаен прекршок се запираат при излез од Македонија. Возачите добиваат записник и платен налог и треба да ја платат глобата пред да продолжат.

МВР претходно соопшти дека системот од 2 февруари до 31 мај регистрирал 33.722 прекршоци од странски возила, од кои 11.258 само во мај. Подоцна, бројот на сите регистрирани прекршоци надминал 120.000, при што околу 95 отсто биле за брзо возење.

Примената започна во шпицот на летната сезона, кога низ Македонија транзитираат голем број туристи и патници од Србија, Косово, Албанија, Грција, Бугарија и други европски земји.На 20 август МВР објави и информација за ставена во функција апликацијата „Безбеден град“ за странски возила, со упатства за постапката.

Според објавените информации, системот првично се применува на Табановце, а потоа треба да се прошири и на останатите гранични премини.