Акциите на азиските компании од секторот за полупроводници забележаа остар пад во средата, поради очекувањата дека демократите ќе освојат мнозинство и во Претставничкиот дом и во Сенатот на американските избори. Инвеститорите стравуваат дека промената на политичката контрола во Конгресот може да доведе до построги регулативи за вештачката интелигенција и изградбата на дата-центри.

Јапонскиот индекс Никеи 225 падна за повеќе од четири проценти, предводејќи ги загубите на азиско-пацифичките пазари. Обновената загриженост за акциите на компаниите поврзани со вештачката интелигенција дополнително го влоши расположението на инвеститорите, во услови на неизвесност околу резултатите од американските избори.

Референтниот индекс се намали за 4,45 проценти, достигнувајќи го најниското ниво од мај. Според податоците на компанијата ЛСЕГ, најголеми загуби забележале технолошките и енергетските компании, додека поширокиот индекс Топикс ослабел за повеќе од три проценти.

Инвеститорите стравуваат од ограничувања за дата-центрите

Падот се случува во момент кога инвеститорите ја разгледуваат можноста за воведување построги ограничувања за развојот на дата-центри доколку демократите ја преземат контролата врз Конгресот.

Тоа ги засили сомнежите за идната потрошувачка поврзана со вештачката интелигенција и за перспективите на компаниите што инвестираат во оваа технологија. Стравувањата доаѓаат во период кога акциите во секторот веќе се под притисок поради загриженоста дека инвестициите и потрошувачката можеби нема да ги достигнат очекуваните нивоа.

Можноста за ограничување на изградбата на инфраструктурата потребна за развој на вештачката интелигенција дополнително ги вознемири пазарите.

Меѓу компаниите со најголеми загуби е јапонската „Софтбанк груп“, чии акции паднаа за повеќе од осум проценти. Акциите на производителот на чипови „Диско“ се намалија за 10,19 проценти, „Адвантест“ загуби повеќе од осум проценти, а „Ренесас електроникс“ падна за 7,64 проценти. Акциите на „Токио електрон“ изгубија 7,04 проценти од вредноста.

Под притисок се најдоа и водечките јужнокорејски производители на чипови. Акциите на „СК Хајникс“ паднаа за 5,08 проценти, а на „Самсунг електроникс“ за 3,87 проценти. „Сеул семикондактор“ забележа пад од 4,37 проценти.

Тајванскиот гигант во производството на чипови ТСМЦ забележа намалување на вредноста на акциите за 1,09 проценти.

Извор: Си-ен-би-си