Вкупно 1.460 ученици утре и в петок ќе ја полагаат матурата во августовскиот испитен рок. Меѓу нив се и 226 матуранти на кои во јунската сесија им биле поништени тестовите поради препишување.

Според податоците на Државниот испитен центар, за државна матура во август се пријавени 1.328 ученици, за државна стручна матура 126, а за уметничка матура шестмина.

Првиот испит е на 12 август

Првиот испит ќе се полага утре, 12 август, кога кандидатите ќе избираат меѓу математика и англиски јазик како изборен екстерен предмет.

За германски, француски, италијански и руски јазик, како и за историја, во августовскиот рок нема пријавени кандидати.

На 14 август ќе се полага задолжителниот екстерен испит по мајчин јазик и литература. Двата испита ќе почнат во 9 часот.

Полагање на осум локации во четири градови

Поради значително помалиот број кандидати во споредба со јунската сесија, полагањето ќе биде организирано на осум локации во четири градови – Скопје, Тетово, Прилеп и Штип.

Во Скопје ќе се полага на Економскиот, Градежниот и Педагошкиот факултет, како и во спортската сала на АСУЦ „Боро Петрушевски“.

Државниот испитен центар објави список преку кој учениците можат да проверат на која локација треба да се појават.

226 ученици повторно ќе полагаат по поништени тестови

Посебно внимание во августовската сесија ќе има на 226 ученици чии тестови од јунскиот рок биле поништени.

Дел од нив биле фатени како препишуваат за време на испитот, додека кај други неправилностите биле утврдени при прегледувањето на тестовите.

Во јунскиот рок за трите типа матура беа пријавени 14.587 ученици. Просечната оценка од сите матурски испити изнесуваше 3,66 – 3,62 кај државната, 3,91 кај стручната и 3,59 кај уметничката матура.

Годинава матурата првпат се спроведува според новиот концепт со три различни типа – државна, стручна и уметничка. Целта е учениците да се тестираат според содржините што ги изучувале во текот на средното образование.