Американската морнарица тивко им помага на трговски бродови да поминат низ Ормуската Теснина, објави „Wall Street Journal“, повикувајќи се на американски воени претставници. Според извештајот, станува збор за дискретна помош за навигација и безбедно движење низ стратешкиот морски премин, а не за формално обновување на претходната операција „Project Freedom“.

Во еден од последните случаи, американската морнарица помогнала при минувањето на грчки супертанкер со околу два милиони барели нафта низ водите покрај брегот на Оман. Бродот од почетокот на март бил блокиран во Персискиот Залив, а сега плови кон Индија за да го испорача товарот.

Ормуз повторно е тесното грло на светската енергија

Претходно овој месец САД се обидоа да организираат заштитен премин на бродови низ Ормуз во рамки на операцијата „Project Freedom“. Но проектот брзо беше стопиран по иранските напади врз бродови и откако Саудиска Арабија го ограничила американскиот пристап до своите бази и воздушен простор, наведува WSJ.

Портпарол на американската Централна команда соопштил дека САД формално не ја обновуваат операцијата „Project Freedom“ и дека тврдењата за нејзино повторно активирање се неточни. Сепак, американски претставници наведуваат дека морнарицата планира во следните денови да помогне при минувањето на уште десетина бродови, вклучувајќи супертанкери и контејнерски бродови.

Ормуската Теснина останува една од најважните светски рути за транспорт на нафта и гас. Во последните месеци, поради тензиите меѓу Иран и САД, сообраќајот низ теснината е значително поризичен, а дел од бродовите пловат со исклучени системи за следење за да избегнат откривање или поради безбедносни причини.

Во превод, Вашингтон можеби не сака да каже дека ја враќа големата операција во Ормуз, но на море веќе се случува нешто слично: бродовите повторно бараат американска рака за да поминат низ премин од кој зависи голем дел од светската енергетска стабилност.