Грција на 3 октомври ќе ѝ ги предаде на Бугарија посмртните останки што се припишуваат на цар Самуил, соопшти бугарскиот премиер Румен Радев. Според неговата најава, двете земји постигнале договор за предавањето, кој бугарската влада треба да го одобри, а потоа да го потпишат министрите за култура.

Радев најави дека во сабота ќе присуствува на церемонија во Музејот на византиската култура во Солун, чиј домаќин ќе биде грчкиот премиер Киријакос Мицотакис. Оттаму останките треба да бидат пренесени со воен авион во Софија. За нивно пречекување е најавен собир во 12:30 часот на плоштадот „Кнез Александар I Батенберг“, по што ќе следува поворка до црквата „Света Софија“, каде што е планирано да бидат положени во посебен саркофаг.

Останките биле откриени при археолошки ископувања во базиликата „Свети Ахил“, на истоимениот остров во Малото Преспанско Езеро, на територијата на денешна Грција. Нивната идентификација се поврзува со местоположбата на гробот, околностите на погребувањето и антрополошките наоди. Во 2014 година беа изложени за поклонение во Солун, по повод илјада години од смртта на Самуил.

Бугарскиот премиер го оцени договорот како исход на повеќедецениски напори на неговата земја. Веста има особено историско значење и за Македонија, со оглед на местото што Самуил и неговото царство го имаат во македонската историја и во јавните расправи за средновековното наследство.