На 15 септември 1890 година, во градот Торки, Англија, е родена Агата Мери Клариса Милер, подоцна позната како Агата Кристи. Денес таа се смета за најпродаваната писателка на детективски романи во историјата, со дела преведени на повеќе од 100 јазици и продадени во повеќе од 2 милијарди примероци.
Агата е родена како најмладо од трите деца во удобно, но не богато семејство, со татко Американец и мајка Британка. Се школувала дома, каде што мајка ѝ ја поттикнувала да пишува измислени приказни, што било своевидна семејна традиција, бидејќи и постарата сестра на Агата измислувала приказни за забава. Агата сама научила да чита на петгодишна возраст.
Првиот брак и работата во аптека
Во 1914 година, пред почетокот на Првата светска војна, се омажила за полковникот Арчибалд Кристи. Додека тој бил на фронтот, Агата работела како помошничка во аптека, каде што стекнала знаење за отровите, кое подоцна детално ќе го користи во своите романи. Нивниот брак завршил со развод во 1928 година, а во 1930 година таа повторно се омажила, овојпат за археологот Макс Малован, со кого патувала на археолошки експедиции низ Блискиот Исток. Тие места подоцна станале сцена за дел од нејзините најпознати дела.
Еркул Поаро и Мис Марпл
Дебитантскиот роман на Кристи, „Таинствениот случај во Стајлс“, бил објавен во 1920 година и го вовел белгискиот детектив Еркул Поаро, лик кој подоцна се појавил во уште 25 романи во текот на следните пет децении. Во 1930 година таа го создала и својот друг познат лик, аматерската детективка Мис Марпл. Кристи останува единствената писателка на детективски романи која создала два одделни и подеднакво популарни детективски лика.
Освен романи, Агата Кристи напишала и повеќе театарски дела, меѓу кои и претставата „Капан за глувци“, која и денес се изведува во Лондон и се смета за најдолго непрекинато изведуваната претстава во историјата на модерниот театар. Нејзиниот опус опфаќа околу 66 детективски романи и повеќе од 14 збирки раскази, како и шест романтични романи објавени под псевдонимот Мери Вестмакот.
Мистериозното исчезнување
Во 1926 година, откако нејзиниот сопруг Арчибалд ја напуштил поради друга жена, Агата Кристи исчезнала на 11 дена, оставајќи го својот автомобил напуштен. Настанот предизвикал голема потрага и медиумска сензација. Причината за нејзиното исчезнување никогаш не била целосно разјаснета. Во јавноста се појавиле различни шпекулации од тоа дека исчезнувањето било смислено како публицитет до тврдења дека сакала да го вознемири својот сопруг.
Агата Кристи починала на 12 јануари 1976 година во Волингфорд, Англија, на 85-годишна возраст. Во 1971 година била прогласена за Дама-командант на Редот на Британската Империја, едно од највисоките признанија што ги доделува британската круна. До денес, нејзините дела остануваат меѓу најпродаваните во историјата на книжевноста, а Агата Кристи е една од најзначајните авторки во историјата на детективскиот жанр.
