Гранада повторно се најде во центарот на силна сеизмичка активност откако денеска во краток период беа регистрирани повеќе земјотреси во јужниот дел на Шпанија. Најсилниот потрес достигна магнитуда од 4,8 и имал епицентар во близина на Гохар, во поширокото подрачје на Гранада.
Потресите предизвикале паника меѓу жителите, а службите за итна помош примиле повеќе од 50 повици. Во делови од градот луѓето излегувале од домовите и објектите, додека биле регистрирани и случаи на превентивна евакуација од јавни и комерцијални објекти.
Најмалку три лица се здобиле со полесни повреди. Меѓу нив е и малолетно лице кое било пренесено во болница. Засега нема информации за тешко повредени лица.
Пукнатини на згради и паднати делови од фасади
Потресите оставиле видливи траги на повеќе објекти. Пријавени се пукнатини на ѕидови, паднати делови од фасади и други материјални оштетувања, додека на улиците биле забележани и паднати предмети и остатоци од објекти.
Седум улици во Гранада биле оградени поради оштетувања на фасади, паднати ѕидови и други ризици за минувачите. Надлежните служби вршат проверки на објектите за да утврдат дали има посериозни структурни оштетувања.
И Алхамбра погодена од сеизмичката активност
Поради безбедносни причини бил ограничен пристапот до делови од познатата Алхамбра, еден од најзначајните историски комплекси во Шпанија.
Посетителите биле евакуирани од делови на комплексот, вклучително и од Алказабата и Назариските палати, додека дополнителните проверки треба да утврдат дали има оштетувања на историските објекти.
Превентивно биле затворени и некои музеи, спортски објекти и други јавни простории. Здравствените центри продолжиле да работат.
Земјотресите следуваат по силниот потрес од саботата
Денешните потреси доаѓаат само неколку дена по силниот земјотрес што ја погоди областа во саботата, на 15 август.
Тогаш земјотрес со магнитуда околу 5 ја погоди областа во близина на Алхендин. Биле оштетени куќи и автомобили, но тогаш немало пријавени повредени лица.
Оттогаш во провинцијата е регистрирана интензивна серија потреси. Според шпанските власти, од 14 август се регистрирани повеќе од 150 земјотреси во областа, што предизвикува дополнителна загриженост кај населението.
Денеска во само еден час биле регистрирани шест земјотреси, при што пет од нив се случиле во период од околу 20 минути. Покрај најсилниот потрес од 4,8, регистрирани биле и последователни потреси со магнитуда до 4,2.
Надлежните повикуваат на смиреност
Регионалните и локалните власти го активирале планот за итни ситуации поврзани со земјотреси и ги засилиле мерките за безбедност.
Градоначалничката на Гранада, Марифран Карасо, повикала на смиреност, нагласувајќи дека во моментов не може да се предвиди дали ќе има нови потреси. Во меѓувреме, службите продолжуваат со проверки на објектите и инфраструктурата.
Поради безбедноста, метрото во Гранада ја намалило брзината на движење, а дел од јавните објекти останале затворени додека траат проверките.
