Украинскиот претседател Володимир Зеленски изјави дека во последниот месец испратил повеќе писма до различни институции и држави со различни намери, и дека писмото до рускиот лидер Владимир Путин го донело резултатот на кој се надевал.

Изјавата ја даде за време на заедничката прес-конференција со лидерите на нордиските и балтичките земји во Талин, пишува „Украинска правда“.

Го постигнав тоа што ми беше потребно

„Во последниот месец испратив повеќе писма со различни цели, до Европската Унија и Соединетите Американски Држави, Белата куќа и Конгресот, па сè до Путин. Целите беа различни. Што се однесува до Соединетите Американски Држави, на пример, навистина сакав да направам сè нивниот фокус барем малку да се префрли од Блискиот Исток кон Украина“, рече Зеленски.

„Не можам да ги споделам сите детали со вас, но верувам дека на мојата нација ѝ се потребни многу противбалистички ракети. И добив резултат. Нема да изнесувам детали за тој резултат, но успеав. Имав цел кога го испратив писмото до Путин и мислам дека го постигнав резултатот што ми беше потребен“, додаде тој, без да наведе за каков резултат станува збор.

Контекстот на дипломатската преписка

Кон крајот на мај, Зеленски испрати писмо до американскиот претседател Доналд Трамп, во кое предупреди на сè поголемиот недостиг на системи за противвоздушна одбрана во Украина, особено на капацитети за справување со балистички ракети.

Во отворено писмо објавено на 4 јуни, Зеленски му предложи на Путин да одредат датум за средба на која би се разговарало за завршување на војната. Исто така, повика Европа и САД да се вклучат во преговорите меѓу Русија и Украина.

Путин на 5 јуни изјави дека го прочитал отвореното писмо на Зеленски, но дека „не гледа смисла во одржување средба“. Зеленски подоцна појасни дека го објавил отвореното писмо за да ја поттикне реакцијата на Путин, бидејќи Украина има ограничени можности за испраќање сигнали до Русија.