Европскиот центар за превенција и контрола на болести (ЕЦДЦ) регистрираше ширење на Западнонилската треска во 12 земји на континентот. Според официјалните епидемиолошки извештаи, најголем дел од случаите се концентрирани во Јужна Европа, каде што високите температури го зголемија присуството на комарци. Инфекцијата бележи раст и во Македонија, каде што бројот на заболени достигна 43 лица, а Агенцијата за храна и ветеринарство потврди и угинат заразен гавран во Скопје.
Европските епидемиолошки служби бележат највисока концентрација на вирусот на Медитеранот. Италија е најпогодена земја во Европа со над 220 регистрирани случаи. Веднаш зад неа е Грција каде што дури 70 отсто од позитивните пациенти се лоцирани во регионот на Атика и источниот дел на Атина.
Пораст на инфекциите е евидентиран и во други држави. Шпанија пријави 42 случаи, Романија 18, додека Франција регистрираше шест инфицирани лица. Поединечни заразувања пријавија и Србија, Германија и Косово. Во претходните сезонски пресеци на ЕЦДЦ, локален пренос на вирусот беше нотиран и во Унгарија, Австрија, Бугарија, Албанија и Турција.
Поради ризикот од трансфузиски пренос, земјите во зафатените региони воведоа вонредни безбедносни протоколи за тестирање на даруваната крв.
Во Македонија бројот на дијагностицирани пациенти се искачи на 43 лица. Министерот за здравство Сашо Клековски изјави дека од нив 40 се целосно лабораториски потврдени, додека три случаи се водат со еден позитивен тест. Заразувања за првпат се евидентирани во скопските општини Центар и Чаир, што потврдува дека вирусот навлезе подлабоко во урбаните средини.
Опасноста на терен ја потврдија и ветеринарните служби. Лабораториските анализи на Агенцијата за храна и ветеринарство изолираа присуство на Западнонилска треска кај пронајден мртов гавран во Скопје. Ова е прв ваков потврден случај кај птиците во главниот град во рамки на редовниот мониторинг. Бидејќи птиците се примарен резервоар на вирусот, а комарците од родот Culex го пренесуваат врз луѓето, навременото собирање на угинатите птици им помага на властите да ги насочат мерките за дезинсекција кон конкретните жаришта.
