Австриски мотоциклист го загуби животот за време на одржувањето на познатата теренска трка „Динарик рели“ (Dinaric Rally) во Хрватска, откако со возилото излетал во провалија. Трагичната несреќа се случила во близина на местото Висуќ кај Удбина, а веста официјално ја потврди Полициската управа на Личко-сењската жупанија.
Според полицискиот извештај, пријавата за несреќата била примена во понеделникот вечерта во 22:12 часот. Австрискиот државјанин, кој бил официјален учесник на релито, изгубил контрола врз мотоциклот на тежок терен и паднал во бездна. Полициските екипи и дежурните служби извршија увид на местото на настанот за да ги утврдат точните причини за падот. Идентитетот на починатиот возач сè уште не се соопштува во јавноста.
Веднаш по потврдата за трагедијата, раководството на „Динарик рели“ објави дека вториот брзински испит (SS2) е целосно откажан.
„Поради тешка несреќа во која учествуваше еден од нашите натпреварувачи, етапата е прекината. Дополнителни информации ќе соопштиме веднаш штом ги добиеме од надлежните институции“, стои во официјалното соопштение на организаторот.
„Динарик рели“ е повеќедневно меѓународно „rally-raid“ натпреварување на кое учествуваат стотици натпреварувачи со мотори, квадови и теренски возила. Поради суровите планински патишта, непредвидливиот карстен терен на Динаридите и сложената навигација, ова натпреварување во регионалните и европските кругови често го нарекуваат „хрватски Дакар“. Овогодинешното издание се одржува од 22 до 28 август, но по несреќата останува неизвесно како ќе се одвива понатамошниот распоред на етапите.
