Украински беспилотни летала утрово го нападнале округот Ханкала во Грозни, каде што се наоѓа една од најголемите руски воени бази, како и зградата на Федералната служба за безбедност (ФСБ) во селото Знаменское, објавува „Украинска правда“.
Според снимките што кружат на социјалните мрежи, во Грозни се слушнале најмалку две експлозии. Рускиот Телеграм канал „Астра“ објави дека едната експлозија ја погодила областа Ханкала, додека другата целела област во близина на железничката станица во градот.
Ханкала е дом на руска воена база и штаб на 42-та гардиска моторизирана дивизија, која дејствува како дел од 58-та комбинирана вооружена армија на Јужниот воен округ.
Напад во центарот на градот
Железничката станица се наоѓа во самиот центар на Грозни – на помалку од два километри од резиденцијата на Рамзан Кадиров и приближно 1,2 километри од комплексот Грозни, објави истражувачкиот медиум „Агентство“. „Астра“ исто така истакнува дека зградата на седиштето на чеченската ФСБ е оддалечена само 120 метри.
Опозицискиот Телеграм канал Нијсо објави видео на кое наводно се гледа напад врз зградата на ФСБ во селото Знаменское. „Целта е прецизно погодена. Жителите слават, додека поддржувачите на Кадиров тагуваат. Раководството ќе биде незадоволно“, се вели во објавата на каналот, осврнувајќи се на следбениците на про-кремљскиот чеченски лидер Рамзан Кадиров.
Истовремено, утрово беа пријавени експлозии и во Јарослав , по што избувна пожар во тамошната рафинерија за нафта. Наводно, цел на нападите беа и Москва и Ростов на Дон.
Украинскиот претседател Володимир Зеленски потврди дека украинските сили извршиле напад со долг дострел, кој иронично го нарече „санкции со долг дострел“, насочен кон нафтен објект во рускиот град Јарослав.
Покрај тоа, руското Министерство за транспорт објави дека операциите се суспендирани на 13 аеродроми на југот на Русија. Одлуката е донесена откако дрон удри во административната зграда на службата за воздушна навигација во Ростов на Дон.
