Американскиот претседател Доналд Трамп изјави дека примирјето со Иран ќе биде продолжено до моментот кога иранската страна ќе поднесе унифициран предлог и додека преговорите не се завршат на еден или друг начин. Извори запознаени со внатрешните дискусии во администрацијата пренесоа за CNN дека Трамп планира да му даде на Иран ограничен временски рок за да излезе со конкретна позиција на преговорите.
Американската администрација не сака примирјето да се продолжи на неодредено и е загрижена дека Иран намерно го одложува дипломатскиот процес. Самиот Трамп наводно не бил расположен за продолжување на примирјето по денешниот рок, но сепак го стори тоа. САД сметаат дека моменталната состојба наликува на онаа по 12-дневната војна, со таа разлика што Иран сега ја држи контролата врз Ормускиот теснец, што претставува значајна стратешка предност.
Трамп изјави дека добри вести во врска со втората рунда разговори меѓу двете страни би можеле да дојдат уште во петок, додека извори од Исламабад ги пофалија позитивните посреднички напори, оживувајќи ја можноста за нови мировни разговори во следните 36 до 72 часа.
Во меѓувреме, ситуацијата на теренот дополнително се закомплицира. Иран отвори оган врз три брода во Ормускиот теснец, интензивирајќи го нападот врз клучниот воден пат за глобалните енергетски резерви. Нападите ги извршила паравоената Револуционерна гарда, која запленила два од бродовите и ги однела во Иран. Нападите доведоа до скок на цената на суровата нафта Брент на речиси 100 долари за барел. Портпаролот на иранското Министерство за надворешни работи го потврди продолжувањето на примирјето, но не дал конкретна потврда дека Техеран е подготвен да учествува во нова рунда преговори.
