Основачот на CNN, Тед Тарнер, кој почина на 87 години, зад себе остава значајно финансиско и филантропско наследство. Неговата нето вредност се проценува на околу 2,3 милијарди долари, но тој уште за време на животот најави дека нема да го остави целото богатство на своите деца.
Тарнер во 2010 година ја потпиша „Заклетвата за давање“, иницијатива на Бил Гејтс, Мелинда Гејтс и Ворен Бафет, со која најбогатите поединци се обврзуваат да донираат најголем дел од своето богатство за добротворни цели.
Во своите јавни изјави, тој нагласуваше дека филантропијата е централна вредност во неговиот живот, инспирирана од неговиот татко, кој уште во неговата младост го учел значењето на враќање кон заедницата.
Фондација и еколошки ангажман
Во 1990 година, Тарнер ја основа Фондацијата Тарнер, која се фокусира на заштита на животната средина, квалитетот на воздухот и водата, како и зачувување на природните живеалишта. Тој често истакнуваше дека патувањата низ повеќе од 60 земји му го промениле погледот кон светот и го поттикнале да инвестира во хуманитарни и еколошки проекти.
Тарнер имаше пет деца од три брака, меѓу кои и со актерката Џејн Фонда, како и 14 внуци и две правнуци. Тој беше и еден од најголемите приватни земјопоседници во САД, со околу 2 милиони хектари земја. Во 2018 година јавно откри дека се соочува со форма на деменција, која влијаела на неговата меморија и енергија.
Иако финансиски беше меѓу најуспешните медиумски претприемачи, Тарнер најчесто беше спомнуван по неговиот филантропски ангажман и ставот дека богатството треба да има општествена цел. Неговото наследство, според многумина, не е само во милијардите долари, туку и во идејата дека влијанието на еден бизнисмен се мери и преку тоа колку враќа на општеството.
