Сликовницата „Штркот Гвин“ од Марина Мијаковска денес во 11 часот ќе биде промовирана во промотивниот центар на „Саем на книгата“. Книгата е во издание на „Едука мак“ од Скопје, а промотор ќе биде Билјана Лотеска.
„Штркот Гвин“ е сликовница наменета за деца од училишна возраст, но и за читатели од сите генерации. Низ авантурите на штркот Гвин, авторката отвора приказна со дидактичка порака, едукативни елементи и мотиви поврзани со семејните вредности, љубовта кон градот и почитувањето на културното наследство.
Приказната е инспирирана од Скопје и неговите препознатливи културно-историски обележја, како Старата скопска чаршија, Камениот мост, Скопското Кале и плоштадот. Штркот Гвин од Трансилванија пристигнува во Скопје како гостин, но низ приказната неговата улога се менува и тој станува домаќин.
Сликовницата ги запознава читателите и со светот на штрковите – какви птици се, колку живеат, како се хранат и зошто се преселуваат. Илустрациите во книгата се дело на Игор Јовчевски.
Промоцијата ќе биде збогатена со настап на децата од градинката „Детска радост“ од Автокоманда.
