Британскиот премиер Кир Стармер изјави денес дека ќе ги увери оние кои се сомневаат во Лабуристичката партија, откако десетици пратеници од Лабуристичката партија побараа негова оставка поради лошите резултати на локалните избори.
Стармер рече дека ќе се соочи со големи предизвици и ќе ја врати надежта во Велика Британија, што вклучува приближување кон Европската Унија и „ставање на Велика Британија во срцето на Европа“.
„Знам дека имам сомневачи и знам дека морам да им докажам дека грешат, и ќе го направам тоа“, рече Стармер за време на говорот во Лондон.
Тој додаде дека ќе им докаже на милиони луѓе кои се уморни од статус квото, кое ги изневери, дека владата е на нивна страна.
Тој рече дека Лабуристите се во „борба за душата на нацијата“ и дека Велика Британија ќе се упати по „темен пат“ ако на власт дојде десничарската партија „Реформа на Велика Британија“, предводена од Најџел Фараж.
Поранешната вицепремиерка Ангела Рејнер, која се смета за потенцијален ривал на Стармер, изјави дека „она што се прави во моментов не функционира и мора да се промени“.
Рејнер не го повика директно Стармер да поднесе оставка, но го обвини дека раководи со „токсична култура на кронизам“ и додаде дека владата мора „да остане верна на вредностите на работничката класа и социјалдемократите“.
„Ова можеби е нашата последна шанса“, рече Рејнер во неделата.
Лабуристите претрпеа голем пораз минатата недела на локалните избори во Британија.
Изборите се толкуваат како неофицијален референдум за Стармер, чија популарност нагло опадна откако тој извојува убедлива победа пред помалку од две години.
