Шведска пресретна руски воени авиони што летаа во близина на нејзиниот воздушен простор над Балтичкото Море во петокот, соопштија шведските вооружени сили во саботата. Шведската војска соопшти дека нејзините борбени авиони „Грипен“ биле полетале во два одделни наврати за да пресретнат руски авиони Су-24 и Су-34, но дека не се случило нарушување на шведскиот воздушен простор, објави „Киев Индепендент“ .

Кристерсон: Повторувањето на руските активности е сериозно прашање

Шведскиот премиер Улф Кристерсон оцени дека инцидентите се дел од шемата на руски воени активности во регионот.

„Двапати во истиот ден, нашите воздухопловни сили ги подигнаа ловците JAS 39 Gripen за да пресретнат руски воени авиони во близина на шведскиот воздушен простор. Повторувањето на руските активности над Балтичкото Море е сериозно прашање“, рече Кристерсон на социјалните медиуми, додавајќи дека „брзиот одговор на воздухопловните сили покажува зошто подготвеноста е неопходна секој ден“.

Иако овој пат немаше нарушување на шведскиот воздушен простор, Кристерсон нагласи дека инцидентот покажува колку брзо може да се промени ситуацијата. „Важно е Шведска, заедно со своите сојузници, да открива, идентификува и пресретнува руски воени авиони со цел да го обезбеди сопствениот воздушен простор“, заклучи тој.