Голем шумски пожар во подножјето на Сиера Невада се приближува кон станбените зони во градот Рино, поради што властите во американската сојузна држава Невада наредија итна евакуација на над 90.000 жители. Огнената стихија, именувана како „Хок“ (Hawk Fire), зафати површина поголема од 60 квадратни километри и сè уште не е ставена под контрола, јавуваат американските служби за вонредни состојби и новинската агенција АП.
Пожарот избувна во саботата во ридскиот предел северозападно од центарот на Рино, во близина на границата со Калифорнија. Во текот на викендот пламените јазици зафатија огромна површина со сува вегетација, при што уништија неколку станбени куќи и возила. Според првичните извештаи на спасувачките служби, најмалку шест лица се повредени, тројца цивили и тројца припадници на итните служби.
Crews struggled to gain a foothold against a large wildfire near Reno, Nevada, that has forced thousands of people from their homes, destroyed structures and caused multiple injuries. pic.twitter.com/l9ojHo7jfT
— D. Scott @eclipsethis2003 (@eclipsethis2003) August 24, 2026
Истражните органи потврдија дека причина за пожарот е човечки фактор, иако засега не е прецизирано дали се работи за намерно подметнување или за невнимание. Исклучително сувиот терен и силните воздушни струења овозможија пламенот екстремно брзо да се развие.
За да се олесни масовната евакуација и да се обезбеди непречен пристап за противпожарните возила, локалните власти одлучија целосно да ги затворат сите училишта во округот. Илјадници семејства мораа да ги напуштат своите домови за само неколку минути, додека пожарникарите прават одбранбени линии долж главниот автопат за да го спречат пожарот да навлезе во индустриските и деловните зони.
Главната опасност во наредните часови е можната ненадејна промена на насоката на ветерот, што би можело да го пренасочи главниот оган кон поновите и најгусто населени станбени квартови на Рино. Пожарникарските екипи од Невада и соседните калифорниски окрузи се мобилизирани на терен, но тешкиот релјеф ја отежнува интервенцијата од земја.
