Натпреварот меѓу Соединетите Американски Држави и Босна и Херцеговина (2:0) во шеснаесетинафиналето на Светското првенство постави нов рекорд во САД и стана најгледаниот фудбалски натпревар во историјата на американската телевизија.

Според прелиминарните податоци, преносот на англиски и шпански јазик го следеле повеќе од 33,5 милиони гледачи.

Соборен рекорд на американската телевизија

Преносот на телевизијата Fox, која ги емитува натпреварите на англиски јазик, во просек го следеле 24,429 милиони гледачи, а во еден момент бројката достигнала 31,883 милиони. Со тоа е урнат рекордот за најгледан фудбалски телевизиски пренос на англиски јазик во историјата на САД.

Досегашниот рекорд го држеше финалето на Светско првенство во фудбал за жени 2015 меѓу САД и Јапонија, кое го следеа 22,3 милиони гледачи.

Зошто се издвојува англискиот пренос?

Во САД големите спортски настани се емитуваат на повеќе јазици. Fox ги поседува правата за англискиот пренос, додека Telemundo и Peacock ги емитуваат натпреварите на шпански јазик. Шпанскиот пренос на натпреварот привлекол дополнителни 9,1 милиони гледачи, па вкупната публика достигнала повеќе од 33,5 милиони.

Иако конечните податоци од агенцијата Nielsen сè уште не се објавени, бројките веќе покажуваат дека станува збор за најголемата телевизиска публика што некогаш следела фудбалски натпревар во САД.

Поголема гледаност и од претходниот рекорд на Мундијалот

Досега најгледан натпревар на ова Светско првенство беше дуелот меѓу Мексико и Еквадор, кој привлече 29,3 милиони гледачи. Натпреварот меѓу САД и БиХ го надмина тој резултат за повеќе од четири милиони гледачи.

Ова се бројки што вообичаено ги достигнуваат само најгледаните преноси од американскиот фудбал. За споредба, просечната гледаност на натпреварите од Sunday Night Football минатата сезона изнесувала околу 23,5 милиони гледачи.

Зошто интересот беше толку голем?

На рекордната гледаност влијаеле повеќе фактори, САД настапуваше како домаќин на турнирот, натпреварот се играше во ударен вечерен термин и носеше директен пласман во осминафиналето. Со победата над Босна и Херцеговина, американската репрезентација ја забележа и својата прва победа во нокаут-фазата на Светско првенство уште од 2002 година.