Германскиот производител на чоколадо Ritter Sport за првпат во својата 110-годишна историја најави отпуштања на работници, поради разочарувачките финансиски резултати во изминатата година. Компанијата соопшти дека ваквата одлука е донесена под притисок на зголемените трошоци и променетото однесување на потрошувачите.
Мерките ќе се однесуваат главно на седиштето во Stuttgart, каде што деловното работење е сериозно погодено од растот на цените на суровините, особено какаото, како и на енергијата и амбалажата. Дополнително, забележлива е и воздржаност кај купувачите, што дополнително влијае врз продажбата.
Компанијата, позната по своето квадратното пакување, вработува околу 1.900 луѓе ширум светот. Во седиштето во Waldenbuch работат околу 1.000 лица, од кои над 600 се административен кадар. Според најавите, ќе бидат укинати околу 70 административни работни места како дел од процесот на намалување на трошоците.
Иако приходите во 2025 година пораснале за 17,7 проценти и достигнале 712 милиони евра, компанијата сепак завршила со загуба. Зголемувањето на цените не било доволно да го покрие силниот раст на трошоците во целиот производствен и дистрибутивен синџир.
Главната причина за притисокот врз профитот е наглото поскапување на какаото, кое во последните години се соочи со проблеми поради лоши временски услови и штетници во западна Африка. Ова доведе до значително поскапување на чоколадото, кое во Германија е за околу 70 проценти поскапо во споредба со 2020 година.
Иако неодамна цените на какаото почнаа да се стабилизираат по подобри жетви, ефектите од претходниот раст сè уште се чувствуваат, што ги принудува производителите на дополнителни прилагодувања.
