Битола овој викенд ќе живее во ритамот на класичната музика, традиционалната чалгија и џезот, со програма што на едно место ги спојува светски познатиот пијанист Симон Трпчески, домашните чалгиски состави, Љубојна и Националниот џез оркестар.

Вечерва, Симон Трпчески ќе настапи на Античкиот театар Хераклеја, во амбиент стар повеќе од два милениуми. Македонскиот пијанист, кој настапувал со водечки светски оркестри и е добитник на престижната награда Gramophone, ќе приреди концерт во рамките на културната програма на Битола.

Паралелно, градот на 14 и 15 август ги одржува првите „Битолски чалгиски денови“, посветени на традиционалната чалгиска музика. Програмата започнува со едукативен семинар во Офицерскиот дом, а вечерните настапи се преселуваат во Старата Чаршија кај Монмартр.

На програмата се Чапче и Тајфата, Филип Шурбевски Езгија Квартет, „Мерак чалгии“, Димитар Андоновски и Бојан Стојков.

Вториот фестивалски ден, 15 август, ќе донесе пајтонско дефиле по Широк Сокак, а вечерта повторно ќе настапат Чапче и Тајфата, по што следуваат Љубојна и Битолскиот Чалгиски Оркестар. Музичкиот викенд ќе заврши на 16 август со настапот на Националниот џез оркестар. Под диригентската палка на Владимир Николов, оркестарот ќе ја изведе програмата „Македонски сновиденија“, која ги спојува македонскиот фолклор и современиот џез.

Програмата носи нови аранжмани на македонски народни песни, но и оригинални композиции инспирирани од домашната музичка традиција. Од звуците на пијаното во Хераклеја, преку чалгијата во Старата Чаршија, до џезот – Битола овој викенд има по нешто за секој љубител на музиката.