Бугарија утре, на 19 април, оди на осми парламентарни избори во последните пет години, во обид да стави крај на долготрајната политичка нестабилност што ја држи земјата во постојан циклус на краткотрајни влади, технички кабинети и недовршени реформи. Овие избори се следат со големо внимание и во ЕУ, затоа што не станува збор само за тоа кој ќе победи, туку и за тоа дали Софија конечно ќе добие поодржлива политичка насока.
Во центарот на изборната трка е поранешниот претседател Румен Радев, кој во јануари поднесе оставка за да влезе директно во парламентарната битка. Според анкетите што ги пренесуваат Reuters, DW и бугарските медиуми, неговата партија „Прогресивна Бугарија“ води пред останатите, со поддршка од околу 30 проценти, што го прави најсилен кандидат за прво место, но не и за самостојно мнозинство.
Кампањата главно се врти околу три теми: корупцијата, инфлацијата и заморот од старите политички елити. Радев настапува со порака дека ќе ја разбие, како што ја нарекува, политичко-олигархиската мрежа што со години ја гуши земјата. Наспроти него стојат веќе познатите партии, пред сè ГЕРБ на Бојко Борисов, додека дел од реформскиот и проевропски блок се обидува повторно да се позиционира како алтернатива на компромитираните центри на моќ.
Резултатите може да влијаат и врз надворешниот курс на Бугарија. Анализите оценуваат дека евентуална посилна победа на Радев би можела да ја направи земјата поостра кон досегашниот бриселски консензус. Радев се спротивставуваше на дел од проевропските потези на последните влади, меѓу нив и на влезот во еврозоната и на договорите за безбедносна соработка со Украина, а во јавноста често беше оценуван како политичар со попомирлив однос кон Москва. Сепак, дури и ако освои најмногу гласови, најверојатно ќе мора да бара коалициски партнери.
Дополнителна тежина на изборите им дава и прашањето за изборниот интегритет. Во пресрет на гласањето биле пријавени повеќе од 1.000 изборни прекршувања, а над 180 лица биле приведени, во контекст на истраги за купување гласови, притисоци и локални мрежи на влијание. Антикорупциски аналитичари предупредуваат дека меѓу 10 и 15 проценти од гласовите може да бидат под ризик од манипулација или контролирано гласање, особено во средини каде локалните политички и економски структури имаат силно влијание.
Властите, пак, се обидуваат да испратат поинаква порака. Техничката влада уверува дека ова треба да бидат најчистите избори во последниве години, со посебни контролни механизми, надзорни единици и телефонски линии за пријавување злоупотреби. Во исто време, има знаци дека излезноста би можела да биде повисока отколку на претходните избори, што е важно бидејќи токму апатијата и ниската доверба во институциите беа едни од најсилните симптоми на бугарската политичка криза.
