Австралија го потврди првиот случај на високозаразниот сој кај птица преселница, откако претходно вирусот беше откриен и на оддалечени субантарктички острови.
Австралија го потврди првиот случај на птичји грип H5N1 на својата територија, со што овој високозаразен сој на вирусот стигна и до последниот континент каде досега не беше регистриран.
Австралиското Министерство за земјоделство соопшти дека вирусот е откриен кај птица преселница, кафеава поморница, на оддалечено подрачје во Западна Австралија. Птицата била пронајдена на плажа во Националниот парк Cape Le Grand, во близина на градот Есперанс, околу 700 километри југоисточно од Перт.
Министерката за земјоделство Џули Колинс изјави дека властите очекувале вирусот во одреден момент да стигне и до Австралија.
„Сите знаевме дека не можеме засекогаш да бидеме поштедени од птичјиот грип“, рече Колинс.
Таа додаде дека се проверува и втор сомнителен случај, кај јужна бурница пронајдена исцрпена на плажа во Есперанс. Засега, според властите, нема докази за масовно угинување на птици или други животни.
Надлежните служби соопштија дека во следните денови ќе се знае дали вирусот се проширил и на други животински популации во Австралија. Главната ветеринарна служба на земјата истакна дека институциите долго време се подготвувале за вакво сценарио, а бил свикан и комитет за итни болести кај животните.
Сојот H5N1 претходно беше откриен и на оддалечените австралиски територии, островите Херд и Мекдоналд во јужниот дел на Индискиот Океан. Таму научниците проценуваат дека вирусот предизвикал масовно угинување на младенчиња морски слонови и зголемена смртност кај дел од популациите на пингвини.
Според студија објавена оваа недела, од август минатата година H5N1 усмртил околу 13.000 младенчиња морски слонови од колонија од околу 17.000 единки на островот Херд. Тоа претставува повеќе од 75 отсто од младенчињата во таа колонија.
Научниците сметаат дека вирусот најверојатно бил донесен на островите преку птици преселници од француските острови Крозе, оддалечени околу 1.800 километри.
Птичјиот грип е болест предизвикана од вирус што главно ги заразува птиците, но повремено може да се прошири и на други животни, како лисици, фоки и видри. Сојот H5N1 во последните години се прошири меѓу дивите птици низ светот и предизвика епидемии кај домашна живина и диви животни.
Инфекции кај луѓе се многу ретки и најчесто се поврзани со директен контакт со заразени животни. Австралиските власти засега не пријавуваат ризик од пошироко ширење меѓу луѓето, но велат дека ќе продолжат со следење на состојбата кај дивите птици и другите животински популации.
Потврдата на првиот случај во Австралија покажува дека H5N1 продолжува да се шири преку миграциските патишта на птиците и дека дури и најизолираните екосистеми не се целосно заштитени од вирусот.
