Дебелината денес претставува глобален здравствен проблем кој сè почесто се третира како хронична болест, а не само како последица на неправилна исхрана. На Европскиот конгрес за дебелина ECO 2026 во Истанбул, експерти од повеќе од 100 земји предупредија дека бројот на луѓе со прекумерна тежина постојано расте, вклучувајќи ги и децата.

Професорот Арја Митра Шарма, основач на организацијата „Obesity Canada“, објаснува дека причините за дебелината се многу посложени отколку што најчесто се мисли. Освен исхраната и недоволната физичка активност, важна улога имаат и стресот, недостатокот на сон, менталното здравје и траумите од детството.

Според него, најголемиот проблем е тоа што телото ја „брани“ стекнатата телесна тежина. Затоа многу луѓе успеваат привремено да ослабат со диети или терапии, но килограмите повторно се враќаат. Професорот нагласува дека дебелината треба да се лекува долгорочно, слично како дијабетесот или висок крвен притисок.

Особено загрижувачки е порастот на дебелината кај децата. Експертите предупредуваат дека проблемот се забележува уште во најрана возраст, а лекувањето кај децата е многу потешко бидејќи многу терапии што се користат кај возрасни не се соодветни за најмладите.

Шарма истакнува дека семејниот пристап е многу важен. Кога едно лице во семејството добива соодветна помош и третман, позитивните промени често се пренесуваат и на останатите членови од семејството.

Тој предупредува и на опасностите од дезинформациите на социјалните мрежи. Според него, многу инфлуенсери и самопрогласени експерти промовираат брзи решенија кои немаат научна основа, што дополнително ги збунува пациентите.

Пораката на професорот е јасна – лицата кои имаат проблем со дебелина треба да побараат помош од доктори и стручни лица, а не да се потпираат на совети од интернет или социјални мрежи.