Наградуваната претстава „Уна“ на театарот Звездара од Белград на 9 септември ќе гостува во Македонскиот народен театар. Претставата е во режија на Дејан Пројковски, а главната улога ја толкува Никола Ристановски. Создадена според драмскиот текст на Стеван Копривица, инспириран од романот на Момо Капор, „Уна“ е современа приказна за љубовта и слободата.
Претставата „Уна“ претставува длабоко емотивна приказна која ги истражува љубовта, сеќавањата, минливоста и човековите избори. Делото говори за границите на слободата, личната одговорност и моќта на чувствата, нудејќи силна сценска енергија. Режисерот Дејан Пројковски создава интимна, поетична и визуелно впечатлива театарска атмосфера, нагласувајќи ја вредноста на автентичните човечки односи.
Никола Ристановски настапува во улогата на професорот Мишел Бабиќ. Неговата интерпретација наиде на исклучителен прием кај публиката и критиката, носејќи му бројни признанија. Ристановски е добитник на наградата „Зоранов брк“ и наградата за најдобро актерско остварување на фестивалот „Денови на Зоран Радмиловиќ“ во Заечар. За истата улога доби награди и на Актерските свечености „Миливоје Живановиќ“ во Пожаревац и на фестивалот „Театар фест Петар Кочиќ“ во Бања Лука. Покрај него играат Магдалена Мијатовиќ, Сена Ѓоровиќ и Марко Гверо.
Уметничката вредност на претставата е потврдена и преку повеќе фестивалски признанија. „Уна“ ја освои наградата од публиката на фестивалот „Денови на Зоран Радмиловиќ“, како и наградите за најдобра претстава и наградата од публиката на Фестивалот „Театар во еден чин“ во Младеновац. Гостувањето на Звездара театар носи врвно регионално остварување кое ги обединува актерската игра на Ристановски и режисерската естетика на Пројковски.
