Инстаграм страницата СОС Преспа, која редовно алармира за еколошките прашања од регионот на Преспа, објави драматична фотографија што совршено ја доловува состојбата: песокот напредува, а водата се повлекува. Под фотографијата стои едноставна реченица – „Не’ напушта Преспанското Езеро :(“ – и навистина така изгледа.
Последниот извештај на Управата за хидрометеоролошки работи (31 октомври 2025) покажува дека нивото на езерото е 36 сантиметри под апсолутниот дозволен минимум, а речиси три метри под сезонскиот просек. Тоа го потврдува и хидролошкиот билтен, според кој моменталното ниво е 840,89 м.н.м, додека просекот за октомври е 843,67 м.н.м.
На терен, водата се повлекува толку брзо што жителите од селата околу езерото веќе сведочат на појави што порано биле незамисливи: плитки заливи се претвораат во суви песочни полиња, а рибите се борат да преживеат во изолираните барички.
Иако научниците со години предупредуваат на потребата од координирана акција меѓу Македонија, Албанија и Грција, бидејќи езерото е трансграничен екосистем, реакцијата на државите останува половична и бавна.
Ова не е само природен циклус, туку аларм за човечката неодговорност и климатските промени што ја уништуваат еколопката рамнотежа на регионот.
А Преспа – нашето планинско бисерче – сега ни исчезнува пред очите.
