Единици на украинската војска на повеќе линии на фронтот добија наредба да ги прекинат борбените дејствија во траење од четири дена, објави „Украинска правда“. Наредбата почна да важи од полноќ и ќе трае до крајот на вторник. Овој неочекуван потег доаѓа непосредно пред најавената мисија на американските преговарачи Стив Виткоф и Џаред Кушнер во Киев и Москва, со цел да се отвори простор за дипломатски разговори за завршување на војната.
Информацијата за прекин на огнот доаѓа од извори во неколку украински бригади распоредени на различни делови од линијата на фронтот. Воените извештаи не прецизираат дали оваа директива ги опфаќа сите армиски формации или важи само за одредени сектори. До овој момент, политичкото раководство во Киев нема излезено со официјално соопштение за прогласено примирје.
Веднаш по полноќ, кога според изворите требаше да настапи затишјето, во украинскиот главен град се огласија сирените за воздушна опасност. Воздухопловните сили предупредија на нова група руски беспилотни летала насочени кон градот, што покажува дека опасноста од воздух не запре со копнената наредба.
Привремениот прекин на огнот се совпаѓа со доаѓањето на американската делегација предводена од Стив Виткоф и Џаред Кушнер. Двајцата пратеници на Доналд Трамп викендов имаат закажани средби во Москва, по што во недела ќе допатуваат во Киев. Ова ќе биде нивна прва директна посета на Украина од почетокот на новата дипломатска иницијатива на Белата куќа.
Американскиот претседател Трамп ја потврди целта на мисијата. „Тоа мора да се реши. Затоа ги испратив Стив Виткоф и Џаред Кушнер. Ги испративме да видат дали можеме нешто да постигнеме. Можеби имаме добра прилика за тоа“, изјави Трамп. Вашингтон притиска за брзо отворање преговарачки канали меѓу двете страни.
Украинскиот претседател Володимир Зеленски претходно даде гаранции дека Украина нема да изведува воздушни удари длабоко во руска територија за време на престојот на американските пратеници. Тој јавно ја повика и Москва на реципрочна воздржаност, со цел да се обезбеди сигурноста на дипломатите.
Ваквиот став означува остар контраст во однос на пораките од почетокот на неделата. Зеленски во вторникот ги предупреди странските авиокомпании и осигурителните куќи дека воздушниот простор над Русија де факто станува затворен и несигурен поради операциите на украинските беспилотни летала со долг домет. Паузата во огнот покажува подготвеност на Киев привремено да ги замрзне ударите додека трае американското посредништво.
