Белгија се соочува со еден од најголемите шумски пожари во својата историја, откако огнената стихија зафати огромно подрачје во природниот резерват Високи Фени, во источниот дел на земјата, во близина на границата со Германија.
Пожарот избувнал во период на екстремни горештини и суша, а силно сувата вегетација овозможила пламените јазици брзо да се шират низ природното подрачје.
До саботата пожарот зафатил околу 1.600 хектари, со што го надминал досегашниот белгиски рекорд од околу 1.300 хектари, регистриран во 2011 година.
Белгија побара помош од Европската Унија
Поради големината на пожарот и потребата од дополнителни воздухоплови за гаснење, Белгија побара помош преку Механизмот за цивилна заштита на Европската Унија.
На барањето одговориле повеќе европски земји, а Европската Унија координирала испраќање воздухоплови за гаснење на пожарот.
На терен се испратени три хеликоптери и два авиони за гаснење пожари од Чешка, Шведска и Холандија. Нивната задача е да им помогнат на белгиските пожарникари да го спречат понатамошното ширење на огнот.
Европската Унија во последните недели повеќепати го активираше својот механизам за помош поради големите пожари низ континентот. Европската комисија може да ги координира ресурсите од земјите учеснички, а доколку националните ресурси не се доволни, може да се активира и стратешката резерва „ресКЕУ“, која располага со противпожарни авиони и хеликоптери.
Пожарот избувна во најголемиот природен резерват
Високите Фени се едно од најзначајните природни подрачја во Белгија. Станува збор за голема висорамнина со шуми, мочуришта и специфични екосистеми, која се протега во близина на границата со Германија.
Токму сувата вегетација во ова подрачје претставува сериозен ризик во услови на долготрајна суша и високи температури.
Европскиот Заеднички истражувачки центар предупреди дека голем дел од Европа од пролетта е под влијание на суша, а прогнозите укажуваат на продолжување на топлото и суво време и во следниот период. Тоа дополнително го зголемува ризикот од шумски пожари.
Европа се соочува со сериозна пожарна сезона
Пожарот во Белгија е само еден од големиот број пожари што во август ја погодија Европа.
Во последните денови илјадници луѓе беа евакуирани поради пожари во Франција, Германија, Велика Британија, Хрватска и Грција. Во Хрватска голем пожар ја погоди околината на Омиш, додека во западна Германија околу 1.800 луѓе беа евакуирани поради пожар што се ширеше кон населено место во близина на границата со Белгија.
Според европските податоци, последователните топлотни бранови годинава придонесоа за исклучително тешки услови за гаснење на пожарите. Сушата, високите температури, ветерот и сувата вегетација создаваат услови огнот многу побрзо да се шири и да биде потешко да се стави под контрола.
Белгиските служби продолжуваат со борбата против пожарот, додека европската помош треба да обезбеди дополнителни капацитети од воздух во момент кога националните ресурси се под голем притисок.
