Папата Лав XIV ја одбележува првата година на чело на Католичката црква, како прв папа од Соединетите Американски Држави. Неговиот избор предизвика големо внимание, особено во САД, каде дел од јавноста го гледа како „освежување“ во споредба со поконзервативните периоди во црковното раководство.
Во изминатата година, Лав XIV привлече поддршка поради своите прогресивни и инклузивни ставови, но и поради подготвеноста јавно да му се спротивстави на Доналд Трамп. Односите меѓу папата и американскиот претседател дополнително се заострија по изјавата на Лав XIV дека „заблудата за семоќ“ ја поттикнува американско-израелската војна против Иран.
Трамп го обвини папата дека со својата осуда на конфликтот „загрозува многу католици“, а го опиша и како „слаб во однос на криминалот и ужасен за надворешната политика“. Папата ги отфрли овие коментари и порача: „Не се плашам од администрацијата на Трамп“.
Многу Американци, без разлика на верската припадност, ја поздравуваат неговата подготвеност да се спротивстави на Трамп. Дел од нив за „Гардијан“ изјавиле дека во папата гледаат личност која зборува со љубов, достоинство и морален авторитет, а не само како верски водач.
Пензиониран наставник од Тексас оцени дека папата Лав XIV ги става во прв план учењата на Исус, наместо црковната догма. Според него, ако некој не може да ги прифати странците и да се однесува кон сите со љубов и достоинство, нема право да води никого.
Позитивни реакции доаѓаат и од католици кои сметаат дека Лав XIV ја воведува Црквата во 21 век. Една пензионирана претприемачка, која живее меѓу Њу Џерси и Италија, изјавила дека слуша многу позитивни реакции за неговите прогресивни и инклузивни ставови, особено во средини со голем број католици.
Поддршка изразуваат и луѓе од ЛГБТК+ заедницата, кои во Лав XIV гледаат продолжение на дел од пристапот на папата Франциск, но со уште поотворен и подиректен став. Дел од нив сметаат дека е охрабрувачки што актуелниот папа може да се доживее како сојузник во време кога многу политички лидери се повлекуваат пред дискриминаторски и насилни политики.
Сепак, не сите сметаат дека папата оди доволно далеку. Дел од соговорниците на „Гардијан“ велат дека неговите критики кон Трамп и други светски лидери треба да бидат уште посилни, особено ако верските водачи сакаат да бидат почитувани како морални авторитети.
Други, пак, го споредуваат неговиот пристап со оној на папата Франциск, особено во однос на климатските промени. Иако сметаат дека Лав XIV не бил толку гласен за климатската криза, ги поздравуваат неговите повици за помалку насилство, повеќе разговори и мирно решавање на конфликтите.
За дел од американската јавност, неговата прва година како папа покажува дека Католичката црква може да има водач кој зборува за мир, достоинство, инклузија и одговорност, дури и кога тоа значи судир со најмоќните политички фигури.
