Европската Унија воведува нова такса за мали пакети нарачани преку интернет, мерка што треба да стапи во сила на 1 ноември. Ова ќе биде втор финансиски филтер за пратките од трети земји во само неколку месеци, насочен директно кон притисокот од кинеските онлајн гиганти врз европскиот пазар. Точната сума дополнително ќе ја утврди Европската комисија, додека наплатата ќе оди преку националните царински служби на земјите членки.

Новата давачка за ракување доаѓа како директно продолжение на мерката од 1 јули, кога Брисел активираше царина од три евра за секоја група производи во пратката. Со новата такса, купувачите на платформи како Тему, Алиекспрес и Шејн ќе плаќаат уште еден додаток при увоз на нарачките.

Пред да почне наплатата на 1 ноември, предлогот на Европската комисија мора да добие официјално одобрение од Европскиот парламент.

Главната причина за воведувањето на овие давачки е обидот да се намали приливот на евтина стока на европскиот пазар. Царинските служби на членките на ЕУ во текот на 2025 година обработиле околу шест милијарди мали пакети купени на интернет. Повеќе од 90 проценти од нив пристигнале од Кина.

Официјален Брисел образложува дека парите од таксата ќе покријат дел од огромните логистички трошоци за инспекција, физичка контрола и следење на огромниот волумен пратки што секојдневно влегува на континентот.

Кинеските онлајн трговци веќе развиваат нови логистички правци за да ги заобиколат препреките. Откако јулските царински правила влегоа во сила, сè поголем дел од стоката се складира и испраќа директно од магацини лоцирани внатре во границите на Европската Унија, со што пратките се ослободуваат од увозни давачки. Втората такса треба да покаже дали Брисел може да држи чекор со овие тактики на прилагодување.