Биткоинот, најголемата криптовалута во светот, падна на најниската вредност во последните две години, откако инвеститорите почнаа да ги повлекуваат парите од поризичните вложувања. Падот се случува во услови на растечка загриженост за вредноста на технолошките компании, особено оние што вложуваат огромни средства во развој на вештачката интелигенција.
Во петокот вредноста на биткоинот се намали за 5,1 отсто, достигнувајќи 55.830 долари, според податоците објавени во саботата наутро. Тоа е неговата најниска цена од септември 2024 година, објави „Ројтерс“.
Претходно во петокот криптовалутата падна и под границата од 60.000 долари, за првпат од јули годинава. Продажбата продолжи и во текот на ноќта, додека инвеститорите ги намалуваа вложувањата во криптовалути и акции што ги сметаат за поризични.
Страв од пукање на технолошкиот меур
Една од главните причини за падот е неизвесноста околу реалната вредност на технолошките компании што развиваат вештачка интелигенција. Инвеститорите сè почесто се прашуваат дали овие компании навистина ќе остварат доволно приходи за да ги оправдаат високите цени на нивните акции.
Во последните години големите технолошки компании вложија огромни суми во центри за податоци, компјутерски чипови и друга инфраструктура неопходна за развој на ВИ. Но, сè уште не е јасно кога и во колкав обем овие инвестиции ќе почнат да им носат профит.
Цените на акциите на многу од овие компании силно пораснаа врз основа на очекувањата за идната заработка. Доколку таа биде помала од предвидената, нивната пазарна вредност би можела значително да се намали. Стравувањата од пад на технолошките акции се прелеваат и на пазарот на криптовалути. Кога инвеститорите стануваат повнимателни, често ги продаваат поризичните средства, меѓу кои е и биткоинот, за да го намалат ризикот од загуби.
Поскапите кредити ја зголемуваат неизвесноста
Дополнителен притисок врз пазарите создаваат и повисоките трошоци за задолжување. Кога каматните стапки растат, компаниите и инвеститорите потешко и поскапо доаѓаат до капитал, што може да ги намали инвестициите и дополнително да ги притисне цените на акциите и криптовалутите. На расположението на инвеститорите влијае и политичката неизвесност во САД по победата на демократите на изборите за Конгрес. Постои загриженост дека можните промени во регулативата би можеле да влијаат врз работењето и тргувањето со криптовалути.
Падот на биткоинот е дел од поширока распродажба
Негативниот тренд не е ограничен само на криптопазарот. Главните американски берзански индекси, кои го следат движењето на акциите на најголемите компании, забележаа една од најлошите седмици во последната година и пол.
Американските берзи немале толку лоша седмица од април 2025 година, кога претседателот Доналд Трамп ги најави опсежните царини за увоз на стоки во САД, во рамките на трговската политика што ја нарече „Ден на ослободувањето“.
Распродажбата особено ги погоди технолошките компании чии акции претходните години бележеа силен раст поради очекувањата поврзани со вештачката интелигенција. Нивниот пад дополнително ја зголеми неизвесноста на финансиските пазари и ги поттикна инвеститорите да ги намалат вложувањата во поризични средства.
Извор: „Индекс“
