Возачите можат значително да влијаат врз потрошувачката на гориво, особено ако возат автомобил со мануелен менувач. Германскиот TÜV објави неколку едноставни совети што можат да помогнат автомобилот да троши помалку, а моторот да работи порамномерно и со помало оптоварување.

Една од најважните препораки е при забрзување што порано да се префрла во повисок степен на пренос, додека при забавување не треба прерано да се враќа во понизок степен. Идеално е моторот да работи меѓу 1.500 и 2.500 вртежи во минута, бидејќи во тој опсег потрошувачката е пониска, а моторот работи потивко.

При тргнување, педалата за гас не треба да се притиска до крај, туку приближно до две третини. Откако ќе се постигне посакуваната брзина, најдобро е таа да се одржува што е можно поконстантно, без нагли забрзувања и кочења.

За дополнителна заштеда, TÜV препорачува навремено пуштање на гасот и умерено кочење, особено при приближување до семафор, крстосница или колона возила. На подолги делници на автопат може да помогне и темпоматот, но во густ сообраќај тој не е особено корисен ако автомобилот нема адаптивна функција.

Потрошувачката ја зголемува и непотребната тежина во автомобилот. Само 50 килограми дополнителен товар може да ја зголемат потрошувачката за околу 0,3 литри на 100 километри. Затоа, освен начинот на возење, важно е возачите да не носат непотребен товар и да го одржуваат автомобилот во добра состојба.