Адвокатите на Кол Ален, обвинет за обид за атентат врз Доналд Трамп, побараа од судијата да ги ублажи затворските ограничувања што ги опишаа како „казнени“. Ален (31) наводно се обидел да го пробие обезбедувањето на вечерата на дописниците од Белата куќа минатата недела, на 27 април, и испукал еден куршум, објави Скај њуз .
Адвокати: Држењето во изолација е казна
Според поднесеното барање до Окружниот суд на САД за округот Колумбија, Ален по апсењето бил сместен во „безбедносна ќелија“, опишана како тапацирана соба со целосна изолација, каде што требало да носи „елек сличен на лудачка кошула“.
Подоцна бил префрлен на „самоубиствен надзор“, што значи дека сè уште не му е дозволено да телефонира, да прима посетители освен неговиот адвокат или да ја напушти ќелијата освен под придружба за туширање или средба со неговиот правен тим.
Во поднесокот се вели дека медицинска сестра препорачала укинување на тие мерки во петокот, но тие остануваат на сила. Адвокатите на Ален тврдат дека статусот „претставува казна“ и го спречува да користи затворски таблет за комуникација со семејството, како и да ги прегледува судските документи што му ги доставиле.
Обвинет за обид за атентат, тој се изјасни за невин
Ален е обвинет за обид за убиство, пукање од огнено оружје при извршување на насилно кривично дело и нелегално транспортирање оружје и муниција преку федерални граници. Наставникот со скратено работно време и аматерски програмер за видео игри од Калифорнија се изјасни за невин и ќе остане во притвор до судењето.
Во меѓувреме, американската обвинителка Џанин Пиро изјави дека владата има докази дека федерален агент бил застрелан за време на наводниот обид за атентат. „Скај њуз“ претходно објави дека постои можност агентот случајно да бил погоден од куршум од еден од неговите колеги.
