Студија на ирската компанија JustCover го издвојува Лисабон како најшарениот град во светот, врз основа на анализа на фотографии во кои се идентификувани повеќе од 2,6 милиони нијанси. Истражувањето покажува дека визуелниот впечаток сè повеќе станува важен фактор при изборот на туристичка дестинација, особено во време кога патувањата масовно се споделуваат на социјалните мрежи.
Главниот град на Португалија е препознатлив по своите пастелни фасади, украсени керамички плочки и историски квартови како Алфама, додека жолтите трамваи кои се движат низ тесните улици му даваат дополнителен шарм. Ваквата комбинација на архитектура и бои го прави Лисабон визуелно уникатен.
На второто место се наоѓа Куала Лумпур во Малезија, каде модерните облакодери се мешаат со традиционални храмови и живописни детали. Веднаш зад него е Порто, уште еден португалски град познат по шарените куќи покрај реката Дуро и автентичната атмосфера.
Во првата петорка се вбројуваат и Картагена, позната по колоритната архитектура и цветните балкони, како и Рио де Жанеиро во Бразил, каде впечатливите пејзажи и познатите скали Селарон создаваат вистински спектакл од бои.
Истражувањето се базира на внимателно избрани дневни фотографии без силни филтри, со цел да се добие реална слика за богатството на бои во секоја дестинација. Резултатите откриваат кои градови нудат највпечатливо визуелно искуство за туристите и љубителите на фотографијата.
На листата на најшарени градови се најде и Дубровник, кој се пласираше на 11-тото место, што го прави единствениот град од регионот со вакво признание. Покрај него, меѓу избраните се и Хавана, Ханој, Барселона и Њујорк, што ја потврдува глобалната разновидност на шарени урбани пејзажи.
