Ако помисливте на ајкулата, сте погрешиле.
Иако многу животни имаат репутација на застрашувачки, само едно може да ја понесе титулата најопасно. Поточно, тоа е животното што убива најмногу луѓе, покажуваат податоците. Холивудските филмови нè наведуваат да веруваме дека најопасни се големите ѕверови како лавовите и крокодилите. Но многу животни се далеку помалку смртоносни отколку што мислиме. Ајкулите, на пример, убиваат само околу 70 луѓе годишно. Изненадувачки, најсмртоносните суштества на Земјата често се многу помали и почесто убиваат преку болести, отров или паразити отколку со остри заби. Еве кои се првите 10.
Лав – убива 200 луѓе годишно
Иако многумина би очекувале „кралот на џунглата“, кој всушност и не живее во џунгла, да биде многу повисоко на оваа листа, лавот и натаму е жесток предатор со кој никој не би сакал да се соочи. Неговиот рик, кој достигнува и до 114 децибели, е доволно предупредување. Најчесто напаѓа ноќе, користејќи остри канџи за длабоки рани и силен угриз што може да скрши коски и череп. Лавовите ловат во помали групи, опкружувајќи го пленот пред да нападнат. Ако човек се приближи премногу до глутницата, особено во време на парење или кога има младенчиња, може да биде нападнат.
Нилски коњ – убива 500 луѓе годишно
Нилскиот коњ можеби звучи како изненадување на оваа листа затоа што е тревојадец, но благодарение на своите огромни заби и агресивната природа, тој е едно од најопасните животни на планетата. Неговите остри очњаци можат да пораснат и до половина метар, а еден угриз може буквално да преполови човечко тело. Силата на угризот на нилскиот коњ е околу 1.800 psi, што е речиси трипати повеќе од онаа на лавот. Исклучително е територијален и напаѓа кога луѓето ќе се доближат до неговото живеалиште, а познато е и дека превртува чамци во одбрана.
Слон – убива 600 луѓе годишно
Слонот, иако често се доживува како мирно и интелигентно животно, е меѓу најопасните поради својата огромна големина и сила. Африканскиот слон може да тежи и до осум тони, а азискиот до пет и пол. Најчесто убива со газење, но може да употреби и сурла за да подигне и фрли човек или да го оттурне со голема сила.
Крокодил – убива 1.000 луѓе годишно
Крокодилот е добро познато опасно животно кое годишно предизвикува до 1.000 пријавени смртни случаи. Самата глетка на неговите заби објаснува зошто овие влекачи се толку опасни. Нилскиот крокодил има угриз со сила до 5.000 psi, најсилен во животинскиот свет, додека морскиот крокодил достигнува околу 3.700 psi. Морските крокодили го фаќаат пленот и изведуваат таканаречено „смртоносно вртење“ за да го совладаат, додека нилските го користат својот силен угриз за да го згмечат пленот, често голтајќи го цел. Тие се агресивни и крајно територијални, а најчесто напаѓаат од заседа во вода.
Шкорпија – убива 3.300 луѓе годишно
Овие древни и агресивни суштества боцкаат со опашката и вбризгуваат отров во пленот. Од повеќе од 2.600 видови, само околу 25 имаат доволно силен токсин за да убијат човек. Една од најопасните е таканаречената „смртоносна ловџика“, која живее во суви и пустински подрачја на Северна Африка и Блискиот Исток. Нејзиниот отров може да биде фатален за деца, постари лица и луѓе со хронични заболувања, особено срцеви проблеми, а поретко и за здрави возрасни лица.
Убилачка стеница – убива 10.000 луѓе годишно
Овие инсекти ја пренесуваат смртоносната Чагасова болест и претставуваат сериозна закана во Централна и Јужна Америка. Болеста се пренесува преку угриз, но и преку консумирање храна или пијалаци заразени со инсектот или неговиот измет што го содржи паразитот Trypanosoma cruzi. Оваа болест ги напаѓа срцето, дигестивниот и нервниот систем, а може да се пренесе и од мајка на дете за време на бременост.
Кучиња – убиваат 59.000 луѓе годишно
Најдобриот пријател на човекот може да стане и негов најголем непријател кога станува збор за беснило. Иако директните смртни случаи од напад на куче се поретки, беснилото што се пренесува преку угриз е исклучително опасно. Најчесто се појавува во посиромашни делови од светот, особено во Африка и Азија. Според Светската здравствена организација, кучињата се одговорни за дури 99 отсто од преносот на беснило на луѓето. Болеста се пренесува преку плунка, преку угриз, гребнатини или контакт со заразени ткива.
Змија – убива 138.000 луѓе годишно
Опасни змии има низ целиот свет и можат да убијат на различни начини. Црната мамба, на пример, може да усмрти човек со само две капки отров, додека питоните можат да проголтаат и возрасен човек. Питоните убиваат така што го стегаат пленот, го гушат, му ги кршат коските и потоа го голтаат цел. Можат да достигнат и до 10 метри должина. Сепак, најголем број смртни случаи предизвикуваат отровните каснувања, а преживеаните често се соочуваат со ампутации и трајни последици.
Човекот – убива 400.000 луѓе годишно
Луѓето, технички гледано, се второто најопасно „животно“ кога станува збор за човечки смртни случаи. Според глобалните податоци, значителен дел од смртноста доаѓа од убиства и други форми на меѓучовечко насилство. Иако човекот не е единствениот вид што убива припадници на сопствениот вид, бројките покажуваат дека човекот останува една од најголемите закани за самиот себе.
Комарец – убива 725.000 луѓе годишно
Комарците се најопасното животно во светот затоа што пренесуваат болести како маларијата. Само женките касаат. Токму поради оваа смртоносност, овој мал инсект оставил огромно влијание и врз историјата на човештвото. Маларијата е особено распространета во Африка, каде што се бележат 95 отсто од случаите и 96 отсто од смртните исходи во светот. Најдобрата заштита е избегнување на каснувања, особено во ризични подрачја, и користење мрежи против комарци.
