Еден од најнеобичните моменти на Светското првенство 2026 се случи на натпреварот меѓу Турција и Парагвај, кога парагвајскиот фудбалер Мигел Алмирон доби директен црвен картон поради потег што ретко се санкционира на фудбалските терени.

Инцидентот се случил во судиското продолжение на натпреварот. Алмирон разговарал со турскиот репрезентативец Мерт Милдир и притоа ја покрил устата со раката додека му се обраќал. Иако на прв поглед изгледало како сосема вообичаена ситуација, судијата неколку моменти подоцна бил повикан од ВАР-собата да ја прегледа снимката.

Главниот судија на натпреварот, Иван Бартон од Ел Салвадор, по проверката на снимката донел одлука да му покаже директен црвен картон на Алмирон. Преку микрофонот објаснил дека играчот намерно ја покрил устата за да спречи да се види што зборува, што според новите насоки се смета за прекршок.

Одлуката е поврзана со таканареченото „Правило на Винисиус“, кое беше воведено по контроверзниот случај на натпревар од Лигата на шампионите меѓу Реал Мадрид и Бенфика. Тогаш аргентинскиот фудбалер Џанлука Престијани ја покрил устата додека разговарал со бразилската ѕвезда Винисиус Жуниор, со цел да не може да се чита од усни што е кажано. Поради тоа беше суспендиран на шест натпревари.

Случајот на Алмирон е првиот ваков инцидент на Светско првенство и веднаш предизвика бројни реакции кај навивачите, аналитичарите и поранешните фудбалери. Дел од јавноста смета дека ваквата санкција е претерано строга, додека други оценуваат дека правилото треба доследно да се применува за сите играчи.

Без оглед на различните мислења, исклучувањето на Мигел Алмирон веќе се смета за едно од најконтроверзните и најбизарните во историјата на мундијалите. Настанот дополнително ја отвори дебатата за границите на новите правила и за тоа колку тие треба да влијаат врз текот на натпреварите на најголемата фудбалска сцена.