Илјадници мигранти и натаму се обидуваат да стигнат до шпанската енклава Сеута, додека тензиите меѓу Италија и Шпанија дополнително се зголемуваат.

Најмалку 18 лица загинаа во обид да ја преминат границата меѓу Мароко и шпанската енклава Сеута, каде што илјадници мигранти и понатаму се обидуваат по морски пат да влезат на шпанска територија. И покрај засилените безбедносни мерки на мароканските власти, голем број луѓе продолжуваат да се собираат во близина на пограничната зона.

Во изминатите денови се регистрирани судири меѓу мигрантите и безбедносните сили, а мароканската полиција користеше водени топови за да ги растера насобраните. Шпанските власти најавија испраќање на војска во Сеута, откако во енклавата пристигнале меѓу 1.500 и 2.000 мигранти.

Мигрантската криза предизвика и политички судир меѓу Италија и Шпанија. Италијанската премиерка Џорџа Мелони побара разгледување на можноста за суспензија на Шпанија од Шенген-зоната, оценувајќи дека ситуацијата е сериозна. Сличен став изнесе и шефот на италијанската дипломатија Антонио Тајани, кој предупреди дека неконтролираната миграција претставува безбедносен ризик.

Шпанскиот министер за надворешни работи Хозе Луис Албарес ги отфрли овие критики, обвинувајќи ја Италија дека мигрантската криза ја користи за политички цели и повика на европска солидарност наместо меѓусебни обвинувања.