Германскиот канцелар Фридрих Мерц смета дека забраната на деснопопулистичката Алтернатива за Германија (АфД) нема да го реши политичкиот проблем што го создава растот на партијата. На заедничката прес-конференција со претседателот на Европскиот совет, Антонио Коста, во Берлин, Мерц порача дека политичките партии треба да се справат со причините поради кои граѓаните ја поддржуваат АфД, наместо проблемот да се обидуваат да го решат преку нејзино укинување.
„Забраната на АфД нема да го реши проблемот што според гласачите на АфД постои во оваа земја“, изјави германскиот канцелар.
Неговата изјава доаѓа само неколку дена откако АфД оствари значаен изборен резултат во источната покраина Саксонија-Анхалт. Партијата освои 43,8 отсто од гласовите и за малку не стигна до апсолутно мнозинство. По изборната победа, премиерот на Северна Рајна-Вестфалија, Хендрик Вист, побара Сојузниот уставен суд да го разгледа прашањето за неуставните определби на АфД и можноста за нејзина забрана.
Вист оцени дека во дел од германските покраини АфД дејствува со цели што се спротивни на уставниот поредок. Сепак, иницијативата наиде на отпор и кај други покраински премиери, а Мерц предупреди дека евентуалната забрана на политичка партија во Германија е можна само под многу строги услови. Според германскиот закон, постапка за забрана пред Сојузниот уставен суд може да биде покрената само по формално барање од еден од двата дома на парламентот или од сојузната влада.
Мерц наместо тоа повика на политичка битка со АфД преку конкретни и убедливи политики. Според него, традиционалните партии треба да им понудат на граѓаните причини повторно да гласаат за нив, наместо да очекуваат проблемот да исчезне преку административна или правна забрана.
Прашањето за статусот на АфД дополнително се усложни минатата година, кога германската служба за внатрешно разузнавање ја прогласи партијата за „докажана“ екстремистичка организација. Примената на оваа класификација подоцна беше привремено суспендирана додека траат судските постапки. Во источноГерманија, пак, неколку локални структури на АфД ја добија истата класификација, што им овозможува на безбедносните служби да ги следат нивните активности.
