Во петок на 14 август на „Охридско лето“ ќе се одржи концертот „Македонски сновиденија“, енергична фузија од македонски фолклор и современ џез, во изведба на Националниот џез оркестар

Концертот ќе се одржи на сцената на Долни сарај во Охрид со почеток во 21 часот, диригент ќе биде Владимир Николов, а специјален гостин – трубачот Питер Сомуа од Гана кој живее и работи во Ротердам.

Националниот џез оркестар ќе ги изведе новите аранжмани на македонски народни песни и оригинални авторски композиции инспирирани од македонската фолклорна традиција. Покровител на концертот е компанијата А1 Македонија, генерален спонзор на Охридско лето.

По иницијатива на компанијата, Националниот џез оркестар направи нов аранжман на познатата народна нумера „Билјана платно белеше“. Аранжманот е на пијанистот Гордан Спасовски, а ќе биде изведена на концертот.

„Македонски сновиденија“ веќе постигна голем успех на меѓународната сцена. Лани во ноември оркестарот реализираше европска мини-турнеја настапувајќи во големата сала ELTE во Будимпешта, модерниот културен центар La Fabrika во Прага и во легендарниот џез клуб Porgy & Bess во Виена.

Годинава во мај концертот беше изведен во Брисел во престижниот културен центар Bozar, каде оркестарот беше пречекан со стоечки овации и високи оценки од европската публика.