Лет на „Визер“ од Лондон за Софија денеска, 2 ноември, беше пренасочен кон Будимпешта по дојава за бомба добиена во текот на патувањето. Авиокомпанијата потврди дека авионот безбедно слетал на меѓународниот аеродром „Лист Ференц“.

Леталото полетало од лондонскиот аеродром Лутон, а требало да пристигне во бугарската престолнина. По заканата биле активирани безбедносните процедури и летот бил пренасочен кон Унгарија.

Лет на „Визер“ под придружба на унгарски „Грипен“

Унгарски борбен авион „Грипен“ бил испратен да го придружува патничкиот авион до Будимпешта, соопшти министерот за одбрана Ромулус Русин-Сенди.

Според податоците на сервисот за следење летови Flightradar24, кои ги наведува „Еуроњуз“, авионот се наоѓал над Босна и Херцеговина кога го сменил правецот кон Унгарија.

По слетувањето, леталото било упатено на определена позиција на аеродромот, каде што надлежните служби ги извршиле потребните безбедносни проверки на авионот и патниците.

Од „Визер“ соопштија дека соработуваат со властите и дека безбедноста на патниците и екипажот останува нивен највисок приоритет.

Унгарскиот министер наведе дека борбениот авион се вратил во базата Кечкемет, а постапувањето со случајот го презела полицијата.