Индискиот стартап „Dognosis“ од Бенгалуру користи кучиња опремени со специјални сензори и софтвер за вештачка интелигенција за откривање рак преку човечки здив. Проектот се развива на фарма во близина на индиската технолошка престолнина, со цел да понуди брз и евтин тест за ран скрининг. Стартапот најавува комерцијално лансирање веќе следната година, со амбиција да ја зголеми стапката на преживување кај пациентите преку навремена дијагностика.

На фарма во предградието на Бенгалуру, кучето Клои вежба анализа на примероци од човечки здив. Животното носи лесен шлем изработен со 3Д-печатење и појас со сензори кои ја мерат мозочната активност, ритамот на дишење и движењата на телото.

Often the cure for cancer already exists – it's early detection.

At Dognosis, we think dogs can be a lot more than pets, they can be partners in driving a revolution in diagnostics and the way we practice medicine. pic.twitter.com/aUzTN6U34k

— dognosis (@dognosis) August 9, 2025

Алгоритам ги претвора овие физиолошки реакции во мерливи податоци. Системот бележи суптилни телесни промени во моментот кога кучето ќе почувствува специфични органски соединенија карактеристични за малигните клетки.

„Во еден час тие можат да направат илјадници душкања. Секое душкање може да евалуира примерок“, изјави за агенцијата АФП соосновачот на компанијата, 26-годишниот Акаш Кулгод.

Индискиот стартап планира комерцијален почеток во текот на следната година, штом завршат сите регулаторни тестирања. Со тоа „Dognosis“ би станал трета ваква специјализирана компанија во светот, по сличните иницијативи што веќе работат во Германија и Израел.

Во здравствени системи каде дијагностичките апарати како магнетна резонанца или компјутерска томографија се недостапни за голем дел од населението, ракот најчесто се открива во доцна фаза. Кучињата обучени за медицински скрининг нудат едноставна прва линија на проверка.

Ова тестирање не поставува конечна дијагноза, туку служи за брзо насочување на суспектните случаи кон понатамошни клинички испитувања. Наместо скапа лабораториска опрема во секое село, методот користи природен биолошки сензор потпомогнат од машинско учење.