Киевскиот режим отвори „Пандорина кутија“ со нападите врз руската цивилна инфраструктура и затоа секојдневно се соочува со одмазда, изјави портпаролот на Кремљ, Дмитриј Песков.

Тој порача дека таквиот одговор ќе продолжи и во иднина.

Песков: Нападите не влијаат врз динамиката на бојното поле

Одговарајќи на прашање за нападите со дронови врз складишта на рускиот интернет-трговец „Озон“, Песков се повика на неодамнешно интервју на рускиот претседател Владимир Путин.

„Тој јасно кажа дека Украина се обидува да нападне инфраструктура на комерцијална трговија и спроведува различни планови. Киевскиот режим во тоа не успева“, рече Песков.

Според него, овие напади не ѝ овозможуваат на Украина да влијае врз динамиката на бојното поле.

Песков додаде дека нападите, како што наведе, повторно ја покажуваат „вистинската природа“ на киевскиот режим.

„Последиците ќе ги чувствуваат и понатаму“

Портпаролот на Кремљ потсети и на зборовите на Путин дека токму Киев ја отворил „Пандорината кутија“ и дека сега се соочува со последиците.

„Последиците во Киев ги чувствуваат секој ден и секоја ноќ, а ќе ги чувствуваат и понатаму“, нагласи Песков.

Напади врз логистички центри на „Озон“

Украинските сили, според руските наводи, трета ноќ по ред нападнале логистички центри на рускиот интернет-трговец „Озон“.

Нападите врз логистичките јазли на „Озон“ следуваат по повеќенеделна кампања на напади врз „Wildberries“, најголемиот руски интернет-трговец.

Путин во саботата за руската државна телевизија изјави дека Киев се обидел да ѝ наштети на руската економија и со тоа ја отворил „Пандорината кутија“.

„Нека очекуваат одговор што ќе ги погоди нивните најчувствителни економски сектори“, порача Путин.