Стадо кози на изолиран остров во Бразил преживеало повеќе од два века без извор на свежа вода, отворајќи нови научни прашања.
На изолираниот вулкански остров Санта Барбара во Бразил, научниците се обидуваат да го објаснат необичниот феномен на стадо кози кои преживеале повеќе од 250 години без пристап до извор на питка вода.
Станува збор за животни донесени од колонизаторите, кои по нивното заминување останале сами во сурови услови. Со текот на времето не само што преживеале, туку и успешно се размножувале.
Иако недостигот на слатка вода е критичен за повеќето животни, овие кози покажале извонредна способност за адаптација. Научниците досега не забележале директно консумирање вода, што отвора дилеми дали користат морска вода или хидратацијата ја добиваат преку растенијата на островот.
Овој феномен предизвикува интерес бидејќи укажува на можни биолошки механизми за преживување во екстремни услови.
Поради нарушување на локалниот екосистем, последните единки неодамна биле преместени од островот. Сепак, истражувањата продолжуваат, а нивната генетска издржливост може да има значење за идни стратегии во земјоделството, особено во услови на климатски промени и зголемена суша.
