Склековите се едноставни – во почетната положба, ставете ги рацете на ширина на рамената, држејќи го телото рамно и паралелно со подот, а потоа кревајте и спуштајте се колку што ви дозволува силата. За почетници има полесна верзија на колена.
Клиниката Мајо објави колку склекови треба да правиме во зависност од возраста и полот.
На пример, 25-годишните мажи треба да направат 28 склекови во еден обид, додека жените треба да се стремат кон 20 склекови.
Бројката се намалува како што одминуваат годините: за мажите на 35-годишна возраст целта е 21, додека жените треба да можат 19.
За 55-годишник, целта е 12 за мажи и 10 за жени, а за 65-годишници од двата пола целта е 10 склека.
Сепак, многу експерти веруваат дека овие препораки не се универзални. Тренерката Наталија Алексејенко истакнува дека е важно да се земат предвид индивидуалните фактори, како што се историјата на повреди, начинот на живот, исхраната, нивото на стрес и квалитетот на сонот.
Тренерот Каролина Беквит се согласува, истакнувајќи дека реалните перформанси често не се совпаѓаат со препорачаните бројки.
„Во мојата група, каде учесниците се претежно на возраст од 40 до 65 години, повеќето прават склекови на колена. Реалните цели и конзистентноста се клучни“, објаснува Беквит.
Докажано е дека редовната физичка активност носи бројни здравствени придобивки.
Студијата од 2019 година покажа дека мажите кои можат да прават склекови имаат 96 отсто помали шанси да развијат срцеви заболувања.
Генерално, редовната физичка активност може да го намали ризикот од разни болести: за 29 отсто го намалува ризикот од рак на дебелото црево, за 31 отсто ризикот од смртност од сите причини, за 35 отсто ризикот од деменција, за 38 отсто од смртта од срцева болест и за 42 проценти од дијабетес.
Според Центрите за контрола и превенција на болести (ЦДЦ), на возрасните им требаат 150 минути активност со умерен интензитет во текот на неделата, како што се возење велосипед, танцување или брзо одење. Два дена треба да посветиме на зајакнување на мускулите преку склекови, чучњеви или кревање тегови.
