Од 1 јули туристите ќе мора да платат влез за посета на Келнската катедрала во Германија, една од најпосетуваните туристички атракции во Европа. Новата мерка се воведува поради растечките трошоци за одржување на објектот и зголемениот број посетители.

Според најавите, воведувањето на влезница се однесува на туристичките посети на внатрешниот дел од катедралата, додека верниците кои доаѓаат на богослужба или молитва и понатаму ќе имаат бесплатен пристап. Исто така, одредени делови за тивка молитва и палење свеќи ќе останат слободни за посета.

Катедралата во Келн е една од најзначајните готски градби во Европа и е под заштита на УНЕСКО. Секоја година ја посетуваат милиони туристи, што дополнително ги зголемува трошоците за безбедност, одржување и управување со просторот.

Од управата на катедралата посочуваат дека последните години се соочуваат со финансиски дефицит, поради што е неопходно воведување на нови извори на приходи. Точната цена на влезницата и начинот на наплата сè уште не се прецизирани.

Со оваа одлука, Келнската катедрала се приклучува на сè поголем број европски религиозни објекти и културни знаменитости кои воведуваат наплата за туристички посети.