Властите во Британска Колумбија соопштија дека средното училиште во Тамблер Риџ ќе биде урнато и повторно изградено на друга локација, по консултации со преживеаните, семејствата и локалната заедница.
Средното училиште во канадскиот град Тамблер Риџ, во кое во февруари се случи едно од најсмртоносните пукања во историјата на земјата, ќе биде урнато. Одлуката ја соопшти премиерот на Британска Колумбија, Дејвид Иби, по состаноци на училишниот одбор со преживеаните, семејствата на жртвите и локалната заедница. Според него, пораката од учениците, наставниците, вработените и жителите била јасна — училиштето треба да се премести на нова локација.
Иби изјави дека властите сакаат да бидат сигурни дека постапуваат правилно кон преживеаните, семејствата и луѓето од Тамблер Риџ. Тој претходно, на комеморација по трагедијата, ветил дека младите од овој град повеќе нема да мора да се вратат во зградата во која се случи нападот.
Во нападот загинаа девет лица, а десетици беа повредени. Канадските власти го идентификуваа напаѓачот како поранешен ученик на училиштето, кој бил пронајден мртов по нападот. Полицијата и понатаму го истражува мотивот, а случајот длабоко ја потресе Канада и ја отвори дебатата за безбедноста во училиштата и поддршката на заедниците по вакви трагедии.
Училиштето остана затворено по нападот, а дел од учениците наставата ја следат во привремени монтажни училници поставени на училишното земјиште. Новата школа ќе се гради на друга локација во истиот оддалечен планински град, а проектот ќе биде финансиран со поддршка од покраинската и федералната влада.
Уривањето е планирано за летото. Властите велат дека целта е учениците и наставниците да добијат безбедно и пријатно место за враќање во образовниот процес, без секојдневно соочување со просторот во кој се случила трагедијата.
