На 1 септември 1952 година, списанието „Лајф“ во целост го објавило романот „Старецот и морето“ од Ернест Хемингвеј. Изданието се продало во 5,3 милиони примероци само за два дена, по цена од 20 центи. Книжевното издание на издавачката куќа „Чарлс Скрибнерс санс“ следело една недела подоцна, со прв тираж од 50.000 примероци.
Шест недели на Куба
Хемингвеј го напишал текстот меѓу декември 1950 и февруари 1951 година на Куба, во период кога неговиот личен и професионален живот биле нестабилни. Неговиот претходен роман, „Преку реката и меѓу дрвјата“, наишол на негативни критики, а бракот со неговата сопруга Мери минувал низ криза.
Приказната за старецот и рибата, всушност, му била раскажана околу петнаесет години порано, а Хемингвеј подоцна ја искористил како основа за дело посветено на морето. Пишувал по околу илјада зборови дневно и го завршил ракописот од 26.531 збор за шест недели.
За правото прво да го објави романот, „Лајф“ му исплатил на Хемингвеј 40.000 долари. Бројот на списанието со насловна страница на која бил портретот на писателот се продал во 5,3 милиони примероци само за два дена по објавувањето.
Пулицерова и Нобелова награда
Романот му ја донел на Хемингвеј Пулицеровата награда за фикција во 1953 година. Наредната година, во 1954 година, тој ја добил и Нобеловата награда за книжевност. Во образложението на Нобеловиот комитет било истакнато неговото раскажувачко мајсторство, особено во „Старецот и морето“, како и влијанието на неговиот стил врз современата книжевност.
Дејството на краткиот роман се одвива во текот на три дена, во кои старецот Сантјаго сам рибари на отворено море, надвор од патеката на Голфската струја. По долга и исцрпувачка борба, тој успева да го совлада огромниот марлин, но на враќањето кон брегот ајкулите ја јадатречиси целата риба, оставајќи го само нејзиниот скелет.И покрај тоа, старецот не се чувствува како поразен. За него, самата борба и победата над сопствените граници се поважни од конечниот исход.
„Старецот и морето“ е последниот роман што Хемингвеј го објавил за време на својот живот и едно од неговите најпознати и највлијателни дела.
