Аларми се огласија низ Израел, а експлозии можеа да се слушнат во Ерусалим и долината на реката Јордан откако Израелците се сокрија во засолништа од бомби. Репортерите на државната телевизија лежеа на земја за време на преносите во живо.
Израел соопшти дека повеќе од 180 проектили биле лансирани во Израел од Иран и дека израелската воздушна одбрана била активирана за да ги пресретне. Воени бродови на американската морнарица помогнаа да се пресретнат некои проектили истрелани од Иран кон Израел, изјави претставник на американската одбрана за Ројтерс.
Listen to the booms.
— Israel ישראל (@Israel) October 1, 2024
This is Israel right now. pic.twitter.com/DKl6HfWjvz
Израелската војска подоцна се огласи дека нападот е завршен и дека жителите можат слободно да ги напуштат своите засолништа.
Иранската револуционерна гарда соопшти дека Иран лансирал десетици проектили кон Израел и дека доколку Израел возврати, одговорот на Техеран ќе биде „подробен и погубен“. Техеран во својот напад цели три израелски воени бази, објави иранската државна новинска агенција.
Портпаролот на израелската војска Даниел Хагари рече дека нападот ќе има последици, исто како и израелскиот амбасадор во ОН Дени Данон.
„Како што претходно ѝ кажавме на меѓународната заедница, секој непријател што го напаѓа Израел треба да очекува болен одговор“, рече Данон.
Израелската војска соопшти дека ќе продолжи со „моќните напади“ низ Блискиот Исток по нападот на Иран, објавија израелските медиуми.
Израелскиот премиер Бенјамин Нетанјаху и уште неколку министри се состанаа во бункер во близина на Ерусалим, каде што ќе се состане и безбедносниот кабинет, изјавија двајца израелски официјални лица.
Израелската војска соопшти дека немаат информации за повредени по иранските ракетни напади, рече Хагари. Но, палестинската управа за цивилна одбрана на Западниот Брег, окупиран од Израел, соопшти дека еден човек загинал во близина на Ерихон, а паѓањето на ракетни остатоци предизвикало штета и пожари во областа.
Висок ирански функционер изјави за Ројтерс дека наредбата за лансирање ракети кон Израел ја дал врховниот лидер на земјата, ајатолахот Али Хамнеи. Хамнеи останува на безбедна локација, додаде високиот функционер.
Цените на нафтата пораснаа за 5% по веста за иранските ракетни напади, кои ги зголемуваат шансите за поширока војна.
