Украина тврди дека во Црното Море се случил првиот директен вооружен судир меѓу две беспилотни пловила во историјата. Според украинската морнарица, единици на Главната управа за разузнавање (ГУР) забележале руско беспилотно пловило во Црното Море, по што во операцијата бил испратен украинскиот поморски дрон „Сарган 3000“.
Украинската страна наведува дека дронот бил опремен со далечински управувана борбена станица „Протектор“ со митралез од 12,7 милиметри. „Сарган 3000“ му се приближил на руското беспилотно пловило и отворил оган, по што целта била уништена, соопшти украинската морнарица.
Киев објави и видео од инцидентот на кое се гледа пукањето и уништувањето на малото пловило. Сепак, идентитетот на уништеното пловило, како и околностите на инцидентот, не може независно да се потврдат.
Поморските дронови стануваат ново оружје во војната
И Украина и Русија во последните месеци забрзано развиваат и користат беспилотни пловила за различни воени задачи. Некои од нив се конструирани за напади со експлозив врз воени и цивилни бродови или крајбрежна инфраструктура, додека други се опремени со митралези и ракетни системи.
Украина развива и поморски дронови способни да транспортираат помали беспилотни летала до позиции во близина на руското крајбрежје. Досега беспилотните пловила главно се користеа за напади врз класични бродови, пристаништа и цели на копно. Доколку украинската верзија за инцидентот во Црното Море биде потврдена, новиот случај би означил значајна промена: беспилотните системи би можеле да се користат не само против традиционални воени цели, туку и директно едни против други.
Тоа би отворило ново поглавје во поморското војување, во кое автономните и далечински управуваните системи би можеле да преземат дел од задачите што досега ги извршуваа екипажите на воените пловила.
